Kgopelo ya kimollo nakong ya kgakanego go tša leago

Diforomo tšeo di swanetšwego go tlatšwa

Ka ga kgopelo ya kimollo nakong ya kgakanego go tša leago

Kimollo nakong ya kgakanego go tša leago ke thušo ya lebakanyana yeo e lebanego le batho bao ba tlogago ba palelwa ke go kgotsofatša bontši bja dinyakwa tša motheo tša malapa a bona.

Ke mang yo a ka hwetšago kimollo nakong ya kgakanego go tša leago?

O ka hwetša kimollo nakong ya kgakanego go tša leago go tšwa mmušong ge o le mabakeng a mathata. Se e ka ba e le ka lebaka la gore:

o nyaka thušo ge o sa emetše mmušo go lokiša kgopelo ye o e dirilego ya tšhelete ya bana
go hlolegile bothata, go swana le ge ngwako wa gago o swele
ga o kgotsofatše dinyakwa tša go amogela tšhelete ya mmušo, empa o mo bothateng bjo bogolo kudu
ga o kgone go šoma ka gobane ga wa phela gabotse mmeleng – se se hlaloša gore ke lebaka la ka fase ga dikgwedi tše tshela o babja
ga o kgone go hwetša tšhelete ya tlhokomelo ya ngwana goba bana go tšwa go motswadi yo mongwe wa bona
yo a bego a hlokometše lapa o hlokofetše
yo a bego a hlokometše lapa o lahletšwe kgolegong lebaka le lekopana (ka fase ga dikgwedi tše tshela) goba
o amilwe ke kotsi ye šoro, empa lefelo leo o dulago go lona ga se la goeletšwa go ba la kotsi.

O hwetša eng?

Kimollo nakong ya kgakanego go tša leago e ka ba ka tsela ya diphuthelwana tša dijo goba boutšhara ya go reka dijo. Diprofense tše dingwe di fa thušo ye ka tsela ya tšhelete. Kimollo nakong ya kgakanego go tša leago e fiwa mo lebakeng le lekopana fela – gantši go lekana dikgwedi tše tharo, mola ka dinako tše dingwe e fiwa go fihla dikgwedi tše tshela.

Seo o swanetšego go se dira

Dira kgopelo ya kimollo nakong ya kgakanego go tša leago ofising ya kgauswi le wena ya Tlhabollo ya Leago.
Eba le dilo tše ge o dira kgopele:
- Pukwana ya gago ya boitsebišo ya dinomoro tše 13 le ditifikeiti tša matswalo tša bana ba gago.
- Ge e le gore ga o na pukwana ya boitsebišo le ditifikeiti tša matswalo, abitafiti ya go tšwa seteišeneng sa geno sa maphaodisa, kgoši, ntona goba moruti e ka amogelega.
Gape o swanetše go ba le bohlatse bja gore:
- o dirile kgopelo ya tšhelete ya mmušo (grant)
- o kile wa ba le mathata (mohlala: fana ka pego ya maphodisa ya go bolela gore ngwako wa gago o swele)
- o kile wa leka go nyaka tšhelete ya go godiša bana (maintenance)
- ga o na thekgo ye nngwe
- o nyetše/nyetšwe, hladile/hladilwe, ga se o nyale/nyalwe
- ga o amogele letseno goba
- o na le bogole bja lebakanyana.

Lebaka

Kgopelo ya gago e tlo fiwa šedi le semeetseng.
Morago ga gore kgopelo ya gago e amogelwe, e tlo sekasekwa go bona ge e le gore o tloga o swanetšwe ke tirelo ye.
Le ge e le gore ga o na le mangwalo ka moka, o tlo hwetša sephuthelwana sa dijo sa kgwedi ya mathomo, boutšhara goba tšhelete ntle le ona.
Gopola go iša mangwalo ka moka a a nyakegago go mohlankedi wa tša leago pele ga ge o ka amogela dijo tša kgwedi ya bobedi e fela. Ge o sa dire bjalo, o ka no se kgone go amogela dijo, boutšhara goba tšhelete mo kgweding ya bobedi le ya boraro.
Ge e le gore ga go be le diphetogo bophelong bja gago ka morago ga go amogela tšhelete ye dikgwedi tše tharo, o ka dira kgopelo ya go okeletšwa nako gore o amogele tšhelete ye dikgwedi tše dingwe gape tše tharo.

�鶹��AV